ما رايك فيما حدث امس السبت 9 ابريل فجرا في ميدان التحرير ؟

اكيد تنامي الي علم كل واحد فينا اللي حصل امبارح ف ميدان التحرير
ايه رايك ف اللي حصل , انا كنت لسه جاي من هناك الساعه 12 وقابلت ناس منهم كتير
وتقريبا قدرت اجمع صورة عن اللي حصل وحصلت معايا مناوشة مع لوا جيش ...... الادب

والله اللي انا شوفتة بعيني امبارح كالاتي
الدنيا هادية وزي الفل واعتصام موجود ف ميدان التحرير , انا بطبيعتي اما اكون قريب م الميدان بعدي اشوف ايه الاخبار
المهم روحت ع الساعه 12 وكله عادي
نزلت الزمالك النهاردة , وبتكلم مع دكتور , قالي انا صحيت م النوم امبارح الفجر علي ضرب نار كثيف ف الميدان
ايه السبب يا دكتور ؟ الله اعمل , ربنا يستر
قررت اني اروح الميدان واعرف ايه الاخبار
روحت الميدان
اول ما دخلت , تحقيق الشخصية والتفتيش اللي بيعملوه اللجان الشعبية كالمعتاد
دخلت لحد الميدان جوة
لقيت ست ف قلب الميدان شايلة ف ايديها فوارغ رصاص حي وفشنك الاتنين , انا بعرفهم
وبتبكي وعنيها حمرا جدا , روحت عليها وسالتها يا اختي مالك بتبكي ليه ؟
قالتلي ببكي ليه وراحت ف البكا اكتر , قولتلها والله ما بتريق ايه اللي حصل انا مش عارف حاجة
قالتلي قتلو بنتي , قتلو ضنايا سنة ونص انضربت بالرصاص الحي , وراحت الست ف البكا والدعا عليهم , وانا سجلت الحوار فيديو
جنب الست , مئاتة كده بلبس جيش , عليه رتبته , وملبسينة كل حاجة عدا البارية
ومتعلق علي المئاتة , اسم صاحب البدلة وورق رسمي مختوم بختم القوات المسلحة
مفادة , انه ف مهمة تطهير الميدان , انا برضه اخدت صور للورق ده
وقابلت ناس كتير وقعدت اسمع منهم ايه اللي حصل
كل الاقوال اتفقت علي مقتل اكتر من 15 واحد وجرح اكتر من 100
ومنظر عربيات الجيش المولعة ف الميدان وحش اوي , ومنظر فوارغ الرصاص وحش اوي
المهم , كان فيه برضه دافع كبير ورا اني اروح التحرير , اللي هو
سامح صاحبي, ووده طبيب , نسيبة كان ف الاعتصام امبارح وكان اخر اتصال ليهم بيه الساعه 12 بالليل , ودلوقت مختفي ومش عارفين عنه حاجة ومقطوع الاتصال بيه وسالو عليه ف كل حتة مش لقيوه
المهم
وانا خارج , حصل مشادة بيني وبين لواء جيش ربنا يجازية علي الالفاظ اللي خرجت من بقة وما تخرجش اصلا من بق واحد عديم التربية , والله الواحد يستحي يقولهالكم
والمشادة برضه اتصورت فيديو والراجل اتصور وهو بيشتمني وانا برد عليه بكل ادب واحترام واقولة انا ادبي ما يسمحليش اني انزل لمستوي حضرتك وارد عليك , انا اعلي من كده بكتير
وهددني بالضرب بالنار الحي وهدد كل الناس اللي كانت موجودة
كل ده ليه
لاننا كنا واقفين نتكلم ف الشارع
والشارع اصلا واقف مضروب عليه سلك شايك ومافيش حركة فيه , ومش مكان ممنوع ده شارع عادي , ومش وقت حظر
ده كل اللي حصل معايا النهاردة